Gjenbruk av materialar og konstruksjonar

Snekkerkomiteen og Husdesign legg stor vekt på å gjenbruke materialar frå tidlegare UKA-arrangement og andre byggeprosjekt framfor å kjøpe nytt.

Miljøstasjonar, veggar og andre konstruksjonar blir så langt det er mogleg bygde solide og med tanke på at dei skal kunne lagrast og brukast igjen ved seinare arrangement. Vi bruker også opp maling frå tidlegare innkjøp før vi kjøper nytt, og supplerer blant anna med maling frå Fargerike i Ås.

Dette bidreg til mindre materialforbruk, mindre avfall og færre nye innkjøp.

Straum framfor aggregat

UKA i Ås prioriterer å kople arrangementsområdet ved Eika til straumnettet framfor å basere drifta på aggregat.

Dette reduserer behovet for lokal forbrenning av drivstoff og gir samtidig mindre støy rundt arrangementsområdet. Løysinga krev meir planlegging og tilrettelegging, men er betre både for miljøet og nærmiljøet.

Lokale innkjøp og leverandørar

Vi prøver å halde innkjøpa så lokale som mogleg for å redusere unødvendig transport. UKA nyttar mellom anna CF Maskin i Vestby og andre leverandørar i nærområdet.

Samtidig prøver vi, både av økonomiske og miljømessige omsyn, å avgrense nye innkjøp og bruke utstyr og materialar vi allereie har tilgang til.

Tekstilar og merchandise

Tekstilar og merchandise blir vurderte særskilt med tanke på miljø, kvalitet og faktisk behov.

Før bestilling vurderer vi mellom anna materialval, mengde og kor lenge produkta kan brukast. Målet er å unngå unødvendig overproduksjon og prioritere produkt med lengre levetid.

Kollektivtransport til og frå UKA

Vi oppmodar gjestane våre til å reise kollektivt til og frå arrangementa.

Det blir ikkje sett opp eigne buss- eller togruter i samband med UKA, men gjestane kan bruke UKA i Ås-appen til å sjekke aktuelle rutetider og planleggje reisa.

Gåing og sykkelparkering

For gjestar som bur i nærleiken, oppmodar vi til å gå eller sykle til arrangementa.

Det finst etablerte sykkelparkeringar på og rundt campus, blant anna ved Samfunnet og teltområdet. Sykkel skal parkerast slik at han ikkje sperrar inngangar, rømningsvegar eller tilkomst for utrykkingskøyretøy.

Kildesortering under UKA

Under UKA blir det sett ut miljøstasjonar med tydeleg merking for:

• matavfall

• restavfall

• plast

• væske

Komiteane har ansvar for orden og avfall i sine eigne område, medan Logistikk & Miljø følgjer opp systemet og sørgjer for at miljøstasjonane er klare til bruk.

Målet er at det skal vere enkelt for både gjestar og frivillige å sortere avfallet riktig.

Gjenbruk og retur av festivalkoppar

UKA i Ås nyttar eit system for innsamling og gjenbruk av festivalkoppar. Brukte koppar blir samla inn separat i barane og leverte tilbake gjennom eigne innsamlingsløysingar, slik at dei ikkje hamnar i restavfallet.

Ved kjøp av drikke kjem det ei miljøavgift på 10 kroner. Gjestar som leverer inn ein brukt plastkopp, slepp miljøavgifta på den neste drikka.

Ordninga skal bidra til høg returgrad, mindre forsøpling og meir gjenbruk. Hovuddelen av overskotet frå miljøavgifta går til veldedigheitsprogrammet til UKA i Ås.

Mindre unødvendig bilkøyring

UKA i Ås arbeider for å redusere unødvendig bilkøyring gjennom betre planlegging og samordning av transportoppdrag.

Vi disponerer elbil og nyttar denne så mykje som mogleg der det er praktisk gjennomførbart. Lokale leverandørar og forhandlarar blir også prioriterte når det er mogleg, slik at transportavstandane blir kortare.

Eiga komité for logistikk og miljø

Til UKA i Ås 2026 er Logistikk & Miljø etablert som ein eigen komité. Komiteen samlar ansvar for transport av varer og artistar, avfallshandtering og delar av miljøarbeidet i éi gruppe.

Dette gjer det enklare å sjå transport, reinhald og miljø i samanheng og gir miljøarbeidet ein tydelegare plass i organisasjonen. Komiteen har også tett dialog med arbeidet rundt klimarekneskapen til UKA.

Reinhaldet på huset blir gjennomført i samarbeid mellom SiÅs, eksternt reinhaldspersonell og Logistikk & Miljø. Målet er betre koordinering og tydelegare ansvarsfordeling gjennom heile arrangementet.

Eit kontinuerleg arbeid

Miljøarbeidet under UKA handlar ikkje berre om eitt enkelt tiltak, men om summen av mange val gjennom heile planlegginga og gjennomføringa.

Vi ønskjer å lære frå kvar UKA og vidareutvikle løysingane våre slik at framtidige arrangement kan gjennomførast med lågare ressursbruk, mindre avfall og eit stadig sterkare miljøfokus.